උක් හකුරු හා පැණි නිෂ්පාදනය පිළිබඳ වැඩසටහන් රැසක්…
උක් පර්යේෂණ ආයතනයේ බෝග පෝෂණ අංශය හා තාක්ෂණ හුවමාරු සංවර්ධන අංශය එක්ව, “උක් කර්මාන්තය සඳහා උසස් තොරතුරු තාක්ෂණයන් යෙදීම” පිළිබඳ සාකච්ඡාවක් 2025 ජනවාරි 28 වන අඟහරුවාදා දින පවත්වන ලදී. මෙම වැඩසටහනේ අරමුණ වූයේ නිලධාරීන්, පර්යේෂකයින් සහ කර්මාන්ත නියෝජිතයින් (විශේෂයෙන් මෙම ක්ෂේත්‍රවල දැනටමත් වැඩ කරමින් සිටින අය) එක්රැස් කර දේශීය උක් කර්මාන්තයේ අභිවෘද්ධිය සඳහා නවීන තාක්ෂණයන් භාවිතා කළ හැකි ආකාරය සාකච්ඡා කිරීමයි.
මේ යටතේ කෘෂිකාර්මික ඩ්‍රෝන යානා, GIS, GPS, ඩිජිටල් සිතියම්ගත කිරීම, අන්තර්ක්‍රියාකාරී සිතියම්, තීරණ සහාය පද්ධති සහ ජංගම සහ පරිගණක මෘදුකාංග වැනි දියුණු මෙවලම් උක් කර්මාන්තයේ භාවිතයට ඇති විභවතාව කෙරෙහි අවධානය යොමු කරන ලදී. තවද, උක් පරියේෂණ ආයතනය මෙන්ම සීනි සමාගම් විසින් භාවිතා කරන තාක්ෂණයන් සහ ඒවායේ ප්‍රතිලාභ සහ අභියෝග පිළිබඳව මෙහිදී සාකච්ඡා කෙරිණි.
මෙම සටහන මගින් උක් කර්මාන්තයේ භාවිතා කළ හැකි නව තාක්ෂණයන් හඳුනා ගැනීම මෙන්ම, ඒවා ක්‍රියාත්මක කිරීමට උපකාර කිරීම සඳහා ක්‍රියාකාරී කණ්ඩායමක් නිර්මාණය කිරීමටත් මෙහිදී තීරණය වූ අතර, එම ක්‍රියාකාරී කණ්ඩායම අදාළ අංශ ඇතුළත් වන සේ එක් එක් ආයතන නියෝජනය කරන ලෙස සාමාජිකයින් පත් කිරීමට නියමිතය. මෙය උක් කර්මාන්තය වඩාත් කාර්යක්ෂම හා තාක්ෂණය මත පදනම් වූ අංශයක් බවට පත් කිරීමට සඳහා අතිශය වැදගත් පියවරක් ලෙස ද හැඳින්විය හැකිය.
මෙම වැඩසටහන මගින් උක් කර්මාන්තයේ තොරතුරු තාක්ෂණය භාවිතය ප්‍රවර්ධනය කිරීම සඳහා අඛණ්ඩ උත්සාහයක කොටසක් ලෙසත්, ප්‍රගතිය නිරීක්ෂණය කිරීම, අභියෝග සාකච්ඡා කිරීම සහ නැගී එන තාක්ෂණයන් ගවේෂණය කිරීම සඳහා අනාගත සැසි කාලාණුරූපීයව පැවැත්වීමටත් තීරණය විය.
මෙම සාකච්ඡාව සඳහා ලංකා සීනි සමාගමේ සෙවනගල හා පැල්වත්ත ඒකක, ඇතිමලේ වැවිලි පුද්ගලික සමාගම, හා ගල්ඔය වැවිලි පුද්ගලික සමාගම යන ආයතන නියෝජනය කරමින් අදාළ නිලධාරීන් ද බෝග පෝෂණ හා තාක්ෂණ හුවමාරු හා සංවර්ධන අංශයේ නිලධාරීන් ද සහභාගී විය.